Aksident trafiku në Gjilan, lëndohen tre persona

Tre persona kanë marrë lëndime trupore si pasojë e një aksidenti i cili ka ndodhur të mërkurën rreth orës 03:30 në rrugën “Avdullah Tahiri”, në Gjilan.

Sipas raportit 24-orësh të Policisë së Kosovës bëhet e ditur se aksidenti ka ndodhur mes dy veturave.

“Raportohet për një aksident trafiku në mes dy automjeteve. Përveç dëmeve materiale lëndime trupore kanë pësuar tre persona të cilët pas pranimit të tretmanit mjekësor janë liruar”, thuhet në raport.

Tutje, Policia njoftoi se rasti është në procedurë hetimore.