Abdixhiku propozon Jehona Lushaku-Sadriun për Kryetare të Grupit Parlamentar të LDK-së
Kryetari i Lidhjes Demokratike të Kosovës (LDK), Lumir Abdixhiku, ka propozuar deputeten Jehona Lushaku-Sadriu për Kryetare të Grupit Parlamentar të LDK-së në legjislaturën e dhjetë të Kuvendit të Kosovës.
Përmes një njoftimi publik në rrjetin social “Facebook”, Abdixhiku ka vlerësuar lart figurën dhe angazhimin e Lushaku-Sadriut, duke e cilësuar atë si një deputete me integritet, përgatitje të lartë akademike dhe përvojë politike.
Reklamë
Ai theksoi se ajo është një bashkëpunëtore e afërt, e ndershme dhe e përkushtuar ndaj demokracisë parlamentare, shtetit ligjor dhe orientimit euroatlantik të Kosovës – vlera që, sipas tij, përbëjnë themelin e LDK-së.
“Jam i bindur se në këtë përgjegjësi të re do ta udhëheqë Grupin Parlamentar me përkushtim, korrektësi politike dhe respekt për njerëzit me të cilët punon,” ka deklaruar Abdixhiku, duke shtuar se Lushaku-Sadriu do ta përfaqësojë LDK-në me dinjitet dhe do të bëjë krenarë mbështetësit e partisë dhe qytetarët e Kosovës.
Propozimi i saj për këtë pozitë vjen në kuadër të organizimit të brendshëm të LDK-së për legjislaturën e re, ndërsa pritet që organet përkatëse të partisë të formalizojnë këtë emërim./atvlive.tv/
Reklamë
